337.- Починал римскиот цар Константин Први Велики, кој со Миланскиот едикт ги запрел прогоните и ја прогласил рамноправноста на христијанството во империјата. Тој е основач на Константинопол (Цариград), новата престолнина на Царството.

1813.- Во Лајпциг е роден Рихард Вагнер, германски композитор, реформатор на операта и централна личност во нејзиниот развој во втората половина на 19 век. Негови најзначајни дела се „Тристан и Изолда“ и „Лоенгрин“. Починал во Венеција на 13 февруари 1883 година.

1819.- Парниот брод „Савана“, изграден во Џорџија, САД, испловил на своето историско патување кон Ливерпул, Велика Британија. Тоа бил првиот пароброд кој за само 25 дена го препловил Атлантикот.

1859.- Роден е англискиот писател Артур Конан Дојл, лекар по професија, кој се прославил како автор на криминалистички романи и раскази во кои главните јунаци се Шерлок Холмс и неговиот пријател д-р Вотсон. Дела: „Спомените на Шерлок Холмс“, „Белиот одред“, „Изгубениот свет“, „Големата бурска војна“, „Историја на спиритуализмот“.

1885.- Во Париз починал Виктор Иго, француски писател, основач на францускиот романтизам во 19 век. Негови најпознати дела се романите „Клетници“, „Ѕвонарот на Богородичната црква во Париз“ и „Работници на море“. Роден бил во 1802 година.

1885.- Роден е водачот на италијанските социјалисти Џанџакомо Матеоти, кого во јуни 1924 година го заробиле и убиле фашистите, по говорот што го одржал претходниот ден во парламентот, во кој документирано ги разобличил фашистичките методи и насилството на изборите.

1903.- Во селото Могила, Битолско, во борба против турската војска и полицијата загинал Андреја Петров Блажески – Расолкоски, познат како Дедо Андреја, македонски револуционер и војвода. Роден бил во Мало Црско, во средината на 19 век.

1907.- Роден е англискиот театарски и филмски актер, режисер и продуцент Лоренс Оливие, еден од најголемите толкувачи на ликови од делата на Вилијам Шекспир. Добитник е на голем број награди „Еми“, наградуван е на фестивалот во Кан, а добил и Оскар за филмот „Хамлет“. Останати филмови: „Хенри Петти“, „Ричард Трети“, „Ребека“, „Отело“, „Спартак“, „Маратонец“…

1915.- Во најголемата железничка несреќа во британската историја, во судир на два воза во Шкотска, загинале 227 лица.

1939.- Двајцата диктатори, Адолф Хитлер и Бенито Мусолини, го потпишале десетгодишниот „челичен пакт“ за политички и воен сојуз.

1943.- Објавено е распуштањето на Комунистичката интернационала (Коминтерна), која била основана во Москва во 1919 година.

1972.- Претседателот на САД, Ричард Никсон, допатувал во Москва како прв шеф на САД кој го посетил Советскиот Сојуз.

1972.- Цејлон го добил името Шри Ланка. Овој ден се прославува како национален празник на Шри Ланка.

1979.- Официјално било верификувано основањето на Битолскиот универзитет (денес Универзитет „Св. Климент Охридски“).

1989.- Индија успешно ја испробала првата ракета „земја-земја“ со среден дострел, станувајќи една од малубројните држави кои располагаат со балистички ракети.

1992.- Словенија, Хрvatска и Босна и Херцеговина биле примени во Обединетите нации.

2003.- Советот за безбедност на Обединетите нации ја усвоил американската нацрт-резолуција со која по 12 години биле укинати строгите санкции против Ирак. Со Резолуцијата 1483 им биле дадени широки овластувања на САД и Велика Британија во управувањето со Ирак и ирачката нафтена индустрија.

2004.- Шпанскиот престолонаследник, принцот од Астурија Фелипе Бурбонски и новинарката Летисија Ортис се венчале во Мадрид. Церемонијата на првото кралско венчавање во Шпанија по 98 години ја обезбедувале силни безбедносни сили.

2016.- Починал Велимир Бата Живојиновиќ, југословенски и српски филмски и телевизиски актер. Играл во повеќе од 280 филмови и серии. Бил еден од симболите на „Црниот бран“ во југословенскиот филм, а светска популарност (особено во Кина) му донесе улогата во филмот „Валтер го брани Сараево“.