Кошаркарите на МЗТ Скопје потешко од очекувањата, но сепак успешно го отворија плејофот, совладувајќи го Кожув со 84-75.

Гостите од Гевгелија подобро го започнаа натпреварот и рано стекнаа двоцифрена предност (16-27), но до крајот на првата четвртина МЗТ успеа да ја намали разликата на 20-27. Кожув продолжи да го контролира резултатот и во втората четвртина, но на полувремето предноста беше минимална, 42-40.

Третиот период донесе израмнета игра и чести промени на водството, а во решавачките десет минути Кожув влезе со тесна предност од 60-59. Сепак, во самиот финиш гостите како да останаа без енергија, што фаворитот го искористи и со серија поени ја завери победата.

Најрасположен кај МЗТ беше Дамјан Стојановски, кој оствари дабл-дабл со 21 поен и 10 скока, додека ист број поени постигна и Душан Танасковиќ. Во составот на Кожув се издвоија Боуен со 24 поени и 15 скока и Николас со 20 поени.

Претходно во текот на денот, победа во плејофот забележа и ТФТ против Тиквеш.

ТФТ му се одмазди на Тиквеш и победи во првиот натпревар од плеј-офот