Тренерот на фудбалерите на Бенфика, Жозе Мурињо, на прес-конференција изјави дека ќе може да зборува за својата иднина дури од понеделник, 18 мај, по завршувањето на португалското првенство, дали да остане во Бенфика или да се врати во Реал Мадрид.

По нерешениот резултат против Брага (2:2), Мурињо одговори на новинарско прашање дали сè уште планира да остане во Бенфика, како што најави уште во март. Португалскиот стручњак рече дека не сака да зборува за иднината додека сезоната е сè уште во тек.

– Последната недела од првенството не е време да се размислува за иднината и договорите. Од моментот кога влеговме во последната недела од сезоната, решив дека не сакам никого да слушам и да бидам целосно фокусиран на мојата работа. Пред нас е натпревар против Есторил, а од понеделник ќе можам да одговорам каква ќе биде мојата иднина како тренер, но и иднината на Бенфика – рече Мурињо.

Во последните денови, шпанските медиуми силно го поврзуваат Мурињо со враќање во Реал Мадрид, каде што би можел да го наследи Алваро Арбелоа, но искусниот тренер уште еднаш нагласи дека не разговарал со „никого од друг клуб“.

Поголемиот дел од прашањата на новинарите беа за неговиот следен чекор, но Мурињо, како и во претходните денови, одби да открие повеќе детали.

– И на тоа ќе застанам, бидејќи не сакам да ја започнам следната сезона суспендиран. Останува само уште еден натпревар, уште осум дена. Не грижете се, останува само уште една недела – се зборовите на Мурињо.