Повеќе од 40 килограми хашиш со улична вредност од 320.000 евра беа пронајдени исфрлени на плажа на југоисточниот грчки остров Родос, соопштија властите, цитирани од онлајн изданието на весникот „Катимерини“.

„Дрогата е пронајдена во петокот во Плимири во близина на Линдос“, се вели во соопштението на крајбрежната стража.

Хашишот бил во пакети содржани во затворена корпа од слама, со вкупна тежина од 42,8 килограми.

Властите на Родос сега ги следат плажите за повеќе пакети хашиш. Не е јасно од каде потекнува дрогата пронајдена во Плимири, забележува изданието.

Кон крајот на март, шпанската полиција откри во Сеута, шпанска енклава во Мароко, голем подземен тунел опремен со шини и мали вагони и користен за транспорт на хашиш помеѓу Мароко и Шпанија.

Властите изјавија дека нивната операција за откривање на тунелот траела повеќе од една година. Тие го опишале тунелот како „лавиринт што личи на рудник“.

Министерството за внатрешни работи соопшти дека мрежата снабдувала дрога не само во Шпанија, туку и во други делови од Европа.

ВИДЕО | Српската полиција откри пет тони марихуана во Шумадија – најголема заплена во историјата