По успехот на женската селекција, и машката кадетска репрезентација на Македонија обезбеди место во финалето на Светското училишно првенство во ракомет.

Во полуфиналниот дуел, македонските ракометари доминираа и убедливо ја совладаа селекцијата на Србија со 29-19. Иако противникот во првото полувреме успеваше да остане резултатски близу, па избраниците на Горан Кузманоски на паузата заминаа со предност од 14-10, во продолжението следуваше целосна контрола на теренот.

Во вториот дел Македонија го засили ритамот и не му остави простор на противникот за пресврт, рутински приведувајќи го мечот кон убедлива победа.

Во финалето, нашата селекција ќе се соочи со победникот од пресметката меѓу Израел и Хрватска, а натпреварот за златниот медал е закажан за утре од 16:00 часот во салата Јане Сандански.

Ракометарките ќе играат за злато на Светското училишно првенство