Проевропската претседателка на Молдавија, Маја Санду, денеска го назначи економистот и бизнисмен Александру Мунтеану за премиер, по победата на неговата партија на парламентарните избори минатиот месец, објави Радио Молдова.

„По консултациите со парламентарните групи, денес го потпишав указот со кој го номинирав г-динот Александру Мунтеану за кандидат за функцијата премиер на Република Молдавија“, напиша Санду на Фејсбук .

Централнодесничарската Партија за акција и солидарност (ПАС) обезбеди 55 места од вкупно 101 во септември, број доволен за формирање нова самостојна влада и одржување на поранешната советска република на проевропски пат.

Изборите се сметаа за клучни за иднината на земјата со 2,4 милиони жители, која граничи со Украина и Романија.

Се очекува Парламентот да гласа за назначувањето на Мунтеану следната недела.

Александру Мунтеану, 61, нема политичко искуство и ретко се појавува во јавноста. Во 2016 година, тој основал компанија за управување со инвестиции во Белорусија, Молдавија и Украина, каде што живеел неколку години пред да се пресели во Букурешт по големата руска инвазија во 2022 година. Тој има молдавско, романско и американско државјанство.