Кога пред неколку месеци имаше поплава во МНР од таму добивме одговор дека „ова не е првпат во зградата на Министерството за надворешни работи да се појави поплава“. Тогаш не беше прв пат, ама ни последен.

При секој дожд во Министерството протекува, па вработените се снаоѓаат со кофи, најлони, а некои и не одат на работа. Протечена вода од покривот до подрумот, кофи распоредени по ходници, пред лифтови, влажни ѕидови… е сликата што се повторува по секој дожд. По вчерашниот, водата ја прекинала и струјата во дел од зградата.

Според вработените, причина за ваквата состојба е настрешницата што се поставува на покривот, односно на терасата на зградата, а според МНР, барем според претходниот одговор, бидејќи сега не добивме објаснување, вината е во досегашното неодговорно одржување на објектот, а не во градењето на настрешницата.

„Вакви случаи се регистрирани и во изминатите години, а причината лежи во долгогодишното, неодговорно и несоодветно одржување и менаџирање на објектот. Градежните активности што се изведуваат во моментов на покривот се насочени кон решавање на овој проблем и трајно спречување вакви појави во иднина“, изјавија тогаш од МНР за „Слободен печат“.

За жал, спречувањето на ваквите појави е далеку од трајно.

ФОТО | Поплава во МНР: Ни се „удави“ надворешната политика