Митиќ прекомандуван во првиот тим на Металург: Ќе имам можност да тренирам и да учам од големи ракометни имиња
Тимот од Автокоманда освен што се засилува со квалитетни ракометари од странство, истовремено мисли и на своите ракометари.
Екипата на Металург во желбата да се вклучи во трката за титулите во домашниот шампионат ангажира неколку засилувања од кои најзвучно е тоа на хрватскиот репрезентативец Златко Хорват, но во исто време мисли и на иднината.
Во новата сезона дел од првиот тим ќе бидат тројца млади ракометари кои беа дел од вториот тим на Металург, Андреј Митиќ, Дарио Кофилоски и Теодор Тодески.
За Андреј Митиќ прекомандувањето во првиот тим е круна на одличната година која ја имаше зад себе, минатото лето беше дел од младата репрезентација на Македонија која настапи на СП првенство кое се одржа во Скопје, е потоа и со вториот тим на Металург играше во Супер лигата.
– Сметам дека преминот во првата екипа на Металург е голем исчекор во кариерата кој може да биде и најважен момент за понатамошниот напредок во мојата кариера. Ќе имам можност да тренирам со големи имиња како Златко Хорват но и Момир Рниќ од кого можам многу да научам.
Морам да им се заблагодарам на претседателката на Металург, Зорица Блажевска и на тренерот Зоран Кастратовиќ за укажаната шанса и можам да кажам дека ќе дадам се од себе да ја оправдам довербата. Морам да му се заблагодарам и на досегашниот тренер Игор Котески од кој можев и научив многу работи како за животот така и за ракометот бидејќи тој е еден од најдобрите пикери во Македонија, позиција на која играм и јас – вели Андреј Митиќ.
Младиот пикер е свесен дека го очекува голема конкуренција, но тоа воедно ќе му претставува и предизвик за понатамошен развој во кариерата. Митиќ е свесен дека минутите мора да ги заработи со максимално залагање на тренинзите.
– Со оглед на големата конкуренција не очекувам поголема минутажа, но на мене е со максимално залагање и одработување на задачите од тренерот Кастратовиќ да се изборам да поголема минутажа. Знам дека ќе добијам шанса и морам да ја искристам максимално – смета младиот пикер.
Металург со ангажманот на искусните Хорват, Рниќ, но и Никола Потиќ и Бранко Канкараш, има големи амбиции во новата сезона.
– Очекувањата за новата сезона се влез во групната фаза од Лигата на Европа како и борба за титулите во Супер лигата и во домашниот Куп – вели Андреј Митиќ.