Дали мислите дека можете да издржите 100 дена во затворен простор, без контакт со пријатели и семејство, под строги правила, во мал тим и целосно отсечени од надворешниот свет? Токму таква е студијата SOLIS100, која Германскиот центар за воздухопловство и вселена (DLR) ќе ја спроведе во Келн од пролет 2026 година – и моментално бара шест доброволци.

Целта на проектот е да се проучи како долготрајната изолација и ограничениот простор влијаат врз човечкото тело и психа – како подготовка за идните мисии кон Месечината и Марс. Учесниците ќе добијат надомест од 23.000 евра, но само ако ги исполнат сите критериуми.

Што подразбира експериментот?

Студијата SOLIS100 е иницирана од Европската вселенска агенција (ESA) и има за цел да ги симулира условите какви што би ги доживеале астронаутите при долги вселенски мисии.

Според раководителката на проектот, Амели Тер, идните оддалечени мисии бараат луѓе кои можат да издржат психолошки, физички и емоционални предизвици:

„Мисиите кон Месечината и Марс бараат ментална издржливост, самостојност и способност да се функционира во изолирана и ограничена средина“, објаснува таа.

Живот во „вештачка“ вселенска станица, на Земја

Шесте избрани учесници ќе живеат 100 дена во симулирана вселенска станица, во средина со ограничени ресурси и строго дефинирана дневна рутина која многу наликува на онаа на вистинските астронаути. За време на престојот, тие ќе работат заедно како екипаж, ќе извршуваат научни задачи, ќе вежбаат секојдневно и ќе се грижат за одржувањето на станицата. Сè ќе се одвива под постојан надзор, бидејќи учесниците ќе бидат следени со 24-часовна видео контрола од страна на научниот тим. Тие нема да имаат можност за излегување, ниту пак ќе имаат директен контакт со надворешниот свет.

За да може некој да се пријави, мора да исполнува строги услови, слични на оние што се бараат од кандидатите за астронаути. Кандидатите треба да бидат на возраст меѓу 25 и 55 години, во целосно добро здравје и физичка форма, со индекс на телесна маса помеѓу 18,5 и 30. Потребно е да имаат завршено најмалку основни студии, а повисокото образование се смета за предност. Се бара и одлично познавање на англискиот јазик, важечко здравствено осигурување и потврда дека лицето не е казнувано. За оние кои не се државјани на земјите од ЕУ или ЕЕА, задолжителни се виза и дозвола за долг престој. Пред конечниот избор, кандидатите ќе поминат низ серија медицински и психолошки прегледи, како и интервјуа за да се процени нивната подготвеност.

Целиот програм трае 126 дена и се состои од неколку фази: две недели подготовка, периодот од 100 дена изолација и една недела опоравување по завршувањето. Дополнително, учесниците ќе мора да присуствуваат на уште два лекарски прегледа – еден по 30 дена и уште еден најдоцна шест месеци по завршувањето на студијата. Проектот официјално започнува на 6 април 2026 година и ќе заврши на 7 август истата година.

Пријавите се отворени до 12 декември 2025 година преку официјалната страница на Германскиот центар за воздухопловство и вселена (DLR).