Додека растат верувањата дека можеби војната на Блискиот Исток би можела да заврши во скоро време, откако израелскиот кабинет се состана во средата за да разговара за евентуално примирје во соседен Либан, од Бејрут пристигаат спротивни сигнали кои говорат дека можеби мирот е сè уште далеку од реалноста на терен.

Имено, либански функционер изјави за Ал Џезира дека нема информации за можен телефонски повик меѓу либанските и израелските лидери за мировни преговори. Изјавата беше одговор на најавата на американскиот претседател Доналд Трамп дека двете земји наскоро ќе одржат разговори, за прв пат по 34 години, објави Ал Џезира.

Неизвесноста ја зголеми новинарката на Ал Џезира, Зеина Кодр, која објави на социјалните мрежи дека не се појавиле детали за можна втора амбасадорска средба во Вашингтон меѓу двете страни како што беше навестено во твитовите на Трамп. Трамп претходно ги најави историските разговори на својата социјална мрежа, Truth Social.

САД и Иран се враќаат на преговарачката маса во Пакистан

Сепак, прекинувањето на борбите во Либан беа клучна точка на сопнување во претходните мировни разговори во Исламабад, заедно со справувањето со нуклеарните амбиции на Техеран.

„Се чувствуваме добро во врска со изгледите за договор“, изјави портпаролката на Белата куќа, Каролин Ливит, на прес-конференција во средата, нарекувајќи ги разговорите посредувани од Пакистан „продуктивни и тековни“.

Таа ги негираше извештаите дека САД официјално побарале продолжување на двонеделниот прекин на огнот договорен од двете страни на 8 април. Повеќе лични разговори сè уште не се потврдени, но веројатно повторно ќе се одржат во Пакистан, посочи Ливит.

Пакистанската војска од друга страна потврди дека началникот на Генералштабот, Асим Мунир, пристигнал во Техеран. Висок ирански извор за Ројтерс изјави дека Мунир, кој посредуваше во последната рунда разговори, ќе се обиде да „ги стесни јазовите“ меѓу двете страни.

Министерот за надворешни работи на Иран, Абас Аракчи, вчера на социјалната мрежа X, поздравувајќи го пакистанскиот дипломат Мунир напиша дека Техеран е посветен на „промовирање на мирот и стабилноста во регионот“.

Војната и последиците од неа

Инаку, разговорите за мир на Блискиот Исток минатиот викенд пропаднаа без договор за завршување на војната, која Трамп ја започна заедно со Израел на 28 февруари, предизвикувајќи ирански напади врз соседите на Иран во Заливот, како и повторно разгорување на конфликтот Израел-Хезболах.

Илјадници луѓе се убиени, главно во Иран и Либан, додека зголемените трошоци за енергија ги потресоа инвеститорите и креаторите на политики низ целиот свет.

Берзите силно пораснаа во последните денови поради очекувањата за брзо решавање на борбите, а индексите на Волстрит достигнаа рекордни максимуми во среда, додека цените на суровата нафта се стабилизираа.

„Иако постојат надежи за деескалација, многу инвеститори остануваат скептични, со оглед на тоа што разговорите меѓу САД и Иран постојано пропаѓаа дури и откако се чинеше дека постигнуваат напредок“, рече Тошитака Тазава, аналитичар во „Фуџитоми секјуритити“.

Министерот за финансии на САД, Скот Бесент, предвиде дека купувањето иранска нафта од страна на Кина ќе паузира со оглед на блокадата на САД врз бродовите што влегуваат во иранските пристаништа. Тој истакна дека САД би можеле да воведат секундарни санкции врз земјите што купуваат иранска сурова нафта.

Министерството за финансии на САД ги предупреди двете кинески банки да не обработуваат ирански пари или да се соочат со санкции, рече тој, без да ги именува банките. Кина претходно купи повеќе од 80% од испорачаната нафта на Иран.

Претходно американскиот претседател Трамп во средата изјави дека му рекол на кинескиот претседател Си Џинпинг да не му дава оружје на Иран, по што претседателот Си изјави дека не го прави тоа. Трамп, на тоа се надоврза дека Кина е многу среќна што тој трајно го отвора Ормускиот Теснец.

„Го правам тоа и за нив и за светот“, напиша тој на социјалните мрежи, додавајќи дека претседателот Си ќе го прегрнел силно штом ќе стигнел во посета на Пекинг за неколку недели.