Министерството за образование и наука (МОН) од денеска започнува со посети на универзитетите низ земјава во рамки на јавната расправа за новиот Закон за високо образование.

Како што најави министерката за образование и наука, Весна Јаневска, целта на посетите е да се отвори директен дијалог со академската заедница и да се слушнат сите забелешки, предлози и сугестии во однос на законското решение.

„Сè уште не е завршена јавната дебата, сè уште очекуваме забелешки. Ние добиваме на ЕНЕР (Единствениот национален електронски регистар на прописи) добиваме и преку мејлот, но очекуваме и универзитетите официјално, на било кој пат, да ги достават своите интегрирани забелешки, бидејќи делот не се повторува. Сè што сметаме дека е разумно ќе биде прифатено. Сè што сметаме дека можеби ќе претставува проблем ќе биде дискутирано. Тоа значи средба на Министерството за образование и наука со сите професори кои ќе сакаат да присуствуваат на јавната расправа, каде што ќе ги дискутираме спорните членови, и гледам дека во најголем број нема никакви забелешки. Спорни остануваат неколку членови за кои треба да се договориме и да дискутираме“, рече Јаневска.

Министерката очекува официјални забелешки од Универзитетите за Законот за високо – немаме време за потпросечни резултати

Посетите ќе опфатат повеќе државни и приватни универзитети, а по завршувањето на јавната расправа се очекува финализирање на текстот на Законот за високо образование, кој потоа ќе биде доставен во собраниска процедура.

Досега, откако првични текстови за предлог-законот беа ставени на ЕНЕР, се појавија некои реакции од академската и стручна јавност, особено откако Јаневска зборуваше за „мултикултурни студии“ и рече дека „постојат бројни такви студии на сите јавни универзитети кои постојано објавуваат некакви студиски програми, а им се запишуваат 3 или 5 студенти, што е неиздржливо“.

Од програмата Меѓународни и интеркултурни студии (МИС) дадоа свои аргументи за оправданост на програмата, а упатените критики ги карактеризираа како „деструктивни“.

„Во ситуација во која, високото образование се соочува со хиперпродукција на монолитни дипломи, дипломирани студенти без никакво искуство и високо образование кое е на дното на сите параметри на академски напредок на светско ниво, деструктивно е токму вакви студентски програми да се критикуваат. Напротив, интердисциплинарноста и квалитетот на студирање на МИС, се вредности кои треба да се стимулираат во скоро сите веќе постоечки студиски програми“, забележаа оттаму.

Деструктивно е да бидеме критикувани, реагираат студенти по Меѓународни и интеркултурни студии по изјавите на министерката Јаневска