Американскиот министер за финансии, Скот Бесент, одржа прес-конференција во Давос недалеку од конгресниот центар на Светскиот економски форум, објави Гардијан.

Тој започна со поздравување на првиот ден од втората година од администрацијата на Трамп и велејќи дека американската влада спроведува ребалансирање на меѓународната трговија, за кое смета дека е одамна задоцнето. Тој исто така изјави дека трговскиот дефицит на САД се намалува со невидена брзина, додавајќи дека податоците од октомври покажуваат дека дефицитот паднал на најниско ниво од 2009 година.

Економија и безбедност

Бесент тврдеше дека светот е побезбеден и попросперитетен кога Америка е силна.

 „Можеме да растеме само заедно со проширување на трговијата“, рече тој.

Односите со Европа

Кога новинарите го прашаа дали САД би започнале трговска војна со Европа и дали вреди да се ризикува американската економија поради Гренланд, Бесент рече дека не е сигурен каква порака испраќаат осумте европски земји што одлучија да испратат војници на Гренланд.

Тој додаде дека претседателот Доналд Трамп јасно ставил до знаење дека САД нема да ја препуштат својата национална безбедност на другите. Тој го обвини, како што рече, својат партнер Велика Британија дека ги разочарала САД во врска со базата на Диего Гарсија со тоа што ѝ ја предала на Маврициус.

Бесент рече дека сите треба длабоко да вдишат, да седнат и да почекаат Трамп да пристигне во Давос и да ги слушнат неговите аргументи.

„Вдишете длабоко, немојте да го имате тој рефлексен гнев што го видовме, ниту таа горчина“, им рече Бесент на новинарите во Давос. „Зошто не седнете и не почекате претседателот Трамп да дојде тука и да ги слушне неговите аргументи? Мислам дека ќе ве убеди“, додаде тој.

Критики за гувернерот на Калифорнија

Скот Бесент потоа го нападна гувернерот на Калифорнија, Гавин Њусом. Запрашан за вчерашната изјава на Њусом дека Бесент е арогантен човек, Бесент возврати дека гувернерот можеби е единствената личност во Калифорнија која знае помалку за економија од Камала Харис.