Меси го изигра ПСЖ, иако е повреден ќе настапи за репрезентацијата на Аргентина
Откако во летниот преоден рок по 20 години си замина од Барселона и се пресели во ПСЖ, Лионел Меси никако да почне да прикажува игрите кои се очекуваат од него.
Меси во Лигата на шампионите постигна три гола во четири натпревари, но во француската Лига 1 сè уште се нема запишано во листата на стрелци. За работите да бидат полоши, Аргентинецот заработи повреда на коленото поради што го пропушти натпреварот против Бордо, но и покрај тоа ќе се појави на подготовките на репрезентацијата.
Ваквиот потег на Меси, да се појави на подготовките на репрезентацијата, го налути спортскиот директор на ПСЖ, Леонардо, кој за „Ле Паризиен“ јасно кажа што мисли за оој потег.
– Ние сме против тоа фудбалерот да и се приклучи на репрезентацијата бидејќи се наоѓа во процес на опоравување од повредата. Нема смислам, вакви работи мора да ги решаваме со ФИФА – изјави Леонардо.
Но, ПСЖ тука е немоќен бидејќи самиот се согласи на условите на Меси.
Имено, при потпишувањето на договорот со Лионел Меси, ПСЖ се согласи со условот на фудбалерот, репрезентацијата на Аргентина да има приоритет во однос на клубот.
Селекцијата на Аргентина во ноемвриските квалификации за пласман на СП 2022 година, ја очекуваат натпревари со Уругвај и Бразил. „Гаучосите“ моментно се наоѓаат на второто место на табелата со 25 бода, шест помалку од лидерот Бразил, а осум повеќе од третопласираниот Еквадор.