Меркел најавува „мега блокада”: Освен полициски час таа сака да го запре локалниот и меѓуградскиот јавен превоз
Германската канцеларка Ангела Меркел се залага за многу поостри мерки за „мега блокада” низ целата држава, јави денeска весникот Билд.
Според весникот, германските власти дискутираат за запирање на локалниот и меѓуградски јавен превоз, како и воведување полициски час. Исто така се зборува за тоа како во овој случај може да се гарантира снабдувањето на населението.
Германија го потврди својот најголем скок во смртни случаи од коронавирус денеска, со најмалку 1.244 лица кои починале од Ковид-19 во последните 24 часа и вкупен број на инфекции – 1.978,590.
Додека вкупниот број на смртни случаи по глава на жител во Германија од почетокот на пандемијата е далеку понизок отколку во САД, нејзината дневна стапка на смртност од средината на декември често ја надминува онаа на САД.
Германија првично се справи со пандемијата подобро од нејзините соседи со силна блокада минатата пролет, но во последните месеци има зголемување на заразени и смртни случаи, а институтот Роберт Кох соопшти дека луѓето не го сфаќаат вирусот доволно сериозно.
Претседателот на институтот Лотар Вилер денеска рече дека ограничувањата не се применуваат доследно како во првиот бран и дека повеќе луѓе треба да работат од дома, додавајќи дека сегашната блокада треба да се заостри.
Во ноември, Германија воведе делумно затворање, но ги заостри правилата во средината на декември, затворајќи продавници и децата не се вратија во училниците од Божиќните празници.
Болниците во 10 од 16 германски покраини се соочуваат со тешкотии бидејќи 85 отсто од креветите за интензивна нега се со пациенти со Ковид-19, рече Вилер.
Меркел требаше да разговара со министрите за да се зголеми производството на вакцини. Досега се вакцинирани само околу еден отсто од германското население или 842.455 лица.
Извор: МИА