Менче Точи го напушта новинарството – ќе раководи со односите со јавност во Фондот за здравство
Новинарката Менче Точи денеска соопшти дека преминува на ново работно место – раководител на секторот за односи со јавност во Фондот за здравствено осигурување
„Драги пријатели и непријатели 🙂 Сакав да ви соопштам нешто јавно, кога ќе дојдеше момент. Но, бидејќи почнаа да сатанизираат на Твитер, на официјален документ на Агенција за администрација, ве известувам: По многу години поминати во новинарството, по многу труд, непроспиени ноќи, работење и за празник и делник, безброј истражувања, добиени највисоки награди, вклучувајќи ја и таа за Животно дело, можеби е време моето знаење и искуство да го насочам на друго место каде ќе бидам од помош, кон институција која е клучна за осигурениците и лекарите- Фонд за здравствено осигурување“, напиша таа на Фејсбук.
Таа вели дека конкурирала на оглас во Фондот, а за тоа раководно место немало друг пријавен. Одлуката е донесена на 21 јануари годинава, врз основа на оглас објавен во декември лани.
„Втора и многу важна работа која ме натера да се откажам од мојата голема љубов – новинарството, е токму лошата состојба и непрофесионализмот кој сѐ повеќе го има, а уште повеќе-добар дел од граѓаните со нивниот говор на омраза и навреди. Иако, непосредно, пак ќе бидам поврзана со медиумите
Помогнав на многу луѓе, таму каде можеше, извршив притисок да се сменат закони и некои работи во здравството. Се надевам еден ден, по пензионирање, ако имам желба ќе се вратам со пишување колумни или емисија или пак, со книга. Дотогаш, да сме здрави и живи! Ништо повеќе не треба! Ви благодарам на поддршката“, напиша Точи.