Првиот заменик претседател на Владата и министер за животна средина, Изет Меџити, заедно со министерот за култура и туризам, Зоран Лутков, денеска го претставија проектот за „оживување на Старата скопска чаршија“.

Првата фаза опфаќа чистење и уредување на подземниот паркинг на Музејот на Македонија со капацитет од 60 возила, како и надворешниот простор за уште 60 возила, кој ќе биде функционален за десет дена.

Во рамки на проектот се предвидени и подземни контејнери, реконструкција на калдрмата на повеќе улици и поставување на подземни кабли со замена на оштетената мрежа на цевки.

„Старата чаршија ќе стане подостапна, почиста и поатрактивна за туристите, граѓаните и бизнисите, каде историјата ќе се почитува, а модерноста ќе коегзистира со неа“, изјави Меџити.

Проектот, како што изјави тој е дел од визијата за трансформација на Чаршијата во жив културен, економски и туристички центар, со посветеност кон одржлив развој и зачувување на наследството.