Кандидатот за градоначалник на Скопје од редовите на Левица, Амар Мециновиќ, објави дека во вторник ќе учествува на телевизиска дебата на Канал 5, заедно со својот противкандидат во вториот круг од локалните избори – Орце Ѓорѓиевски од ВМРО-ДПМНЕ.

„Дебата во вторник на Канал 5, па да си дочекаме уште повеќе дебати. Јас и мојот противкандидат во овој круг означуваме потенцијална промена на политичките генерации во Македонија – релативно млад дуел за Скопје“, напиша Мециновиќ на својот Фејсбук-профил.

Тој додаде дека токму оваа дебата ќе биде можност граѓаните да увидат кој нуди вистинска визија за иднината на главниот град.

„Следниот вторник на дебата ќе може да се заклучи кој претставува нова визија, а кој ја влече деструктивната политика на минатото во иднината“, порача кандидатот на Левица.

Очекувањата се дека дебатата ќе привлече големо внимание кај јавноста, бидејќи се работи за судир на две различни политички концепции и генерации, кои ќе се соочат лице в лице во борбата за градоначалничката функција во Скопје.

Амар или Орце?

Скопјани ќе гледаат спектакл на Канал 5 – Ѓорѓиевски прифати ТВ-дуел со Мециновиќ