Илон Маск го нарече полскиот министер за надворешни работи Радослав Сикорски „лигав имбецил“ откако Сикорски сподели извештај од Американскиот институт за проучување на војната (ISW) во кој се открива дека руските сили сè повеќе користат сателити Старлинк за насочување на напади со беспилотни летала врз Украина, објавува Киев пост.

Според ISW, руските сили ги опремуваат беспилотните летала, вклучувајќи ги BM-35, Шахед и Молња, со системи Старлинк за да го зголемат нивниот дострел и точност. Беспилотните летала опремени со Старлинк можат да погодат голем дел од Украина и да стигнат до делови од Молдавија, Полска, Романија и Литванија ако се лансираат од територија контролирана од Русија.

По споделувањето на извештајот, Сикорски напиша на X: „Еј, голем човеку, зошто не ги спречиш Русите да го користат Старлинк за да ги таргетираат украинските градови? Профитирањето од воени злосторства може да му наштети на твојот бренд.“

Маск остро одговори, нарекувајќи го Сикорски „лигав имбецил“ и бранејќи го Старлинк како „’рбет на украинските воени комуникации“.

Претходни расправии

Маск и Сикорски со години јавно се расправаат за улогата на Старлинк во војната во Украина. Во октомври минатата година, Маск коментираше за можноста за ограничување на пристапот на Украина до сателитската мрежа. На X, тој напиша во тоа време: „Мојот систем Старлинк е ‘рбетот на украинската војска. Целата нивна фронтовска линија ќе се сруши ако ја исклучам“.

Сикорски одговори со предупредување: „Ако Спејсикссе покаже како несигурен снабдувач, ќе бидеме принудени да бараме други добавувачи“.

Тој додаде дека Полска плаќа 50 милиони долари годишно за услугите на Старлинк што ги користи Украина.

Потоа Маск одговори со порака: „Замолчи, мал човеку. Плаќаш само дел од цената. И нема замена за Старлинк“.

Американскиот шеф на дипломатијата, Марко Рубио, се приклучи на дискусијата, велејќи: „Никој не се закани дека ќе ја исклучи Украина од Старлинк“, и обвинувајќи го Сикорски за ширење дезинформации.

Рубио додаде дека без Старлинк, „Украина одамна ќе ја изгубеше оваа војна, а Русите сега ќе беа на границата со Полска“.