Мароканската фудбалска репрезентација се пласираше во полуфиналето на Африканскиот куп на нации вечерва откако го елиминираше Камерун со 2:0 во Рабат.

Играчите на Валид Регрег ја оправдаа својата улога на фаворити и успеаја да дојдат до победата против Камерун.

Почетокот на натпреварот беше обележан со нервозна и донекаде неорганизирана игра на двата тима, а Мароко практично од никаде дојде во водство. Во тек беше 26 минута кога Брахим Диас ја искористи топката што Ел Кааби ја фати по корнер и го постигна својот петти гол на овогодинешниот турнир.

Камерун имаше теренска иницијатива во второто полувреме која не им донесе ништо, освен обидот на Енкуду кој заврши покрај голот.

А потоа, нов шок за гостите во 74 минута кога Агерд, по корнерот од Езалзули, го проигра Исмаел Саибари кој со прецизен удар ја запечати судбината на „лавовите“ во овогодинешното издание.

Мароко во полуфиналната фаза ќе се сретне со победникот од натпреварот меѓу репрезентациите на Алжир и Нигерија.