По двете одржани блокади, граѓанската иницијатива „Стоп за Усје“ утре ќе одржи протестен марш со почеток во 12:00 часот, како притисок за, како што велат, поефикасна институционална реакција за правото на чист воздух во Скопје. Поради тоа, од МВР соопштија дека утре напладне во центарот на Скопје ќе има посебен сообраќаен режим.

Маршот ќе стартува пред Владата, ќе продолжи кон Собранието и ќе заврши пред Министерството за животна средина и просторно планирање.

„Утре (31.01.2026), со почеток во 12:00 часот ќе се одржи протестен марш „Стоп за Цементара“ со траса на движење од пред Влада на РСМ на бул.„Илинден“, десно по бул.„ВМРО“, во продолжение по ул.„Васил Главинов“, лево по ул.„Димитрие Чуповски“, во продолжение по ул.„11-ти Октомври“ до пред Собрание на РСМ и лево по ул.„Филип 2-ри Македонски“ до пред Министерство за животна средина во Скопје. Од тие причини Единицата за безбедност на патниот сообраќај при СВР Скопје ќе преземе мерки за посебен режим на сообраќајот во централното градско подрачје на град Скопје“ соопшти МВР.

Од „Стоп за Усје“ ги повикуваат граѓаните масовно да се приклучат и порачаа дека досега испратиле барања до повеќе институции, но, според нив, не добиле одговор. Токму затоа, велат, одговорите повторно ќе ги побараат „на улица“, со порака дека ниту еден профит не смее да биде поважен од здравјето и животот на граѓаните.