Репрезентацијата на Унгарија обезбеди пласман во финалето на Европското првенство во ватерполо, откако во полуфиналната пресметка славеше над Грција со 15-12.

Грчката селекција подобро го започна натпреварот и ја доби првата четвртина со 5-4, но продолжението целосно им припадна на Унгарците. Во преостанатите три делници, избраниците на Жолт Варга ја презедоа контролата и со сигурна игра стигнаа до заслужен триумф.

Иако натпреварот изобилуваше со цврста и неизвесна борба, Унгарија покажа повеќе смиреност и квалитет во одлучувачките моменти. Во големото финале, унгарската репрезентација ќе се соочи со победникот од второто полуфинале меѓу домаќинот Србија и селекцијата на Италија.

Најистакнат поединец на средбата беше капитенот Кристијан Манхерц, кој постигна четири гола од четири обиди. Воедно, ова беше 30. полуфинале за Унгарија во историјата на Европските ватерполо првенства.