Францускиот претседател Емануел Макрон денес ги потврди плановите за изградба на нов, поголем и помодерен носач на авиони што ќе го замени сегашниот „Шарл де Гол“ и ќе ги зајакне поморските капацитети на Франција.

Макрон, кој првпат зборуваше за плановите во 2020 година, денес им се обрати на војниците во француската воена база во Абу Даби во близина на Ормутскиот теснец, клучен пат за глобален транспорт на нафта.

„Одлуката за започнување на оваа голема програма беше донесена оваа недела“, рече Макрон, додавајќи дека проектот ќе ја зајакне индустриската база на Франција, особено малите и средните претпријатија.

Нов носач на авиони во употреба од 2038 година.
Министерката за армија, Катрин Вотрин, изјави на социјалната платформа X дека новиот носач ќе влезе во употреба во 2038 година, кога се очекува приближно да биде пензиониран „Шарл де Гол“, кој е во употреба од 2001 година. Некои француски пратеници од центарот и умерената левица неодамна предложија проектот за изградба на нов носач на авиони да се одложи со оглед на финансиските тешкотии со кои се соочува земјата.

Франција останува една од водечките воени сили во Европа и една од петте земји што официјално поседуваат нуклеарно оружје.