Македонските војници утрово заминаа во Словенија, ќе помагаат во санирање на последиците од поплавите
Сто припадници на македонската Армија утрово заминаа во Словенија во погодените области од поплавите, каде заедно со словенечките колеги, како дел од хуманитарната операција ќе помогнат во расчистување на теренот. Министерката за одбрана, Славјанка Петровска вчера при посета на војниците им порача успешно да ја завршат задачата и безбедно да се вратат дома.
Нашиот народ секогаш им помага на своите пријатели. 100 припадници на македонската Армија се подготвени за хуманитарната мисија во Словенија. Северна македонија и Словенија се пријателски држави и во тоа име правиме сè што е во наша моќ да помогнеме. Припадници на Армијата, дајте сè од себе исто како што и нашите словенечки пријатели ни помогнаа за време на пожарите пред неколку години, порача Петровска.
На седница на Влада вчера беше изгласано барањето што пристигна од Словенија преку системот за помош и поддршка во кризни ситуации и на НАТО и ЕУ.
Република Северна Македонија, како и досега, продолжува да се става на располагање и солидарно учествува во разни хуманитарни мисии и акции во погодени подрачја од природни непогоди и катастрофи – се вели во соопштението од владината прес-служба.
Илјадници луѓе се евакуирани од своите домови низ северозападна и централна Словенија, а армијата, пожарникарите и спасувачите се обидуваат да ослободат други и да ги расчистат улиците.
Шест лица загинаа од петокот, меѓу кои и двајца холандски државјани. Словенечката агенција за животна средина објави дека поплавите вчера почнале да се повлекуваат, но некои области се уште се отсечени. Европската Унија понуди тешки машини и инженерски единици.
Словенија, исто така, побара хеликоптери, војници и монтажни мостови од воената алијанса на НАТО. Хрватска и Унгарија помогнаа со хеликоптери, а Германија со тим за цивилна заштита.