Македонскиот голман Илиев се врати во Арсенал (ФОТО)
Минатото лето Дејан Илиев беше позајмен од Арсенал во тимот на Серед на нашиот тренер Славчо Војнески.
Војнески ја напушти клупата после серијата негативни резултати, во најсилниот словачки шампионат веќе четири порази по ред за моментно 10. место со 18 бодови, само четири повеќе од последнопласираниот Похроние од кого загуби во минатото коло со 2:1.
– Имаше проблеми во клубот, бидејќи немавме место каде да тренираме, ниту опрема за тренинг. Едноставно неверојатно е да се работи во такви услови – рече Војнески.
Нашиот чувар на мрежата Дејан Илиев се врати во Арсенал и беше дел од тренинг сесијата на првиот тим кој се подготвува за последниот дуел од групната фаза на Лига Европа против Стандард Лиеж.
„Топчиите“ предводени од менаџерот Љунгберг сеуште го немаат обезбедено пласманот во нокаут фазата, моментно се првопласирани со 10 бодови во групата „Ф“, пред Ајнтрахт Франкфурт со девет, трет е Стандард Лиеж (седум), а на дното елиминираниот португалски тим на Виторија Гимараеш (два).
Во полусезоната од првенството во Словачка, Илиев за Серед имаше вкупно 18 натпревари.