На големата сцена на Македонскиот народен театар на 8 јуни (четврток), со почеток во 21 часот, ќе се одржи настанот „Поетроника“, проект што претставува повеќе од едночасовен музичко-сценски електронски акт, односно перформанс во живо, а ќе биде изведен од неговите творци, актерот Оливер Митковски и музичарот Андреја Салпе како резултат на нивната посветеност и повеќемесечно експериментирање.

Покрај спецификата дека станува збор за конкретно македонско поетско творештво, опфаќајќи ги хронолошки сите генерации поети, „Поетроника“ се разликува од сите досегашни слични обиди во самиот пристап кон наративот и се труди да ги избегне стереотипите за тоа како се интерпретира и каква музичка форма прилега на едно поетско изразување.

Перформансот носи длабоко интимна и емотивна симбиоза на електроника, амбиент, џез-елементи и драмска нарација лишена од баналност и патетика.

Проектот е, исто така, вид сведоштво за континуитетот и конзистентноста на македонското поетско творештво, особено во време кога македонскиот јазик, идентитетот и правото на културна самоидентификација се доведени во прашање.

(Текстот е објавен во „Културен печат“ број 181, во печатеното издание на весникот „Слободен печат“ на 2-4.6.2023)