Претставници на ракометните федерации на Србија, Македонија и Црна Гора одржаа заеднички состанок, чија главна тема беше формирањето на регионални лиги во машка и женска конкуренција.

За време на состанокот беа разгледани различни модалитети на организирање на натпреварувањето, вклучувајќи неколку модели на лигашкиот систем, со цел подобрување на квалитетот на ракометот, зголемување на конкурентноста и зајакнување на регионалната соработка.

Сите учесници на состанокот изразија цврст и единствен став дека заедничките лиги треба да започнат веќе од септември оваа година, со високо ниво на организација и професионални стандарди.

Конечната одлука за форматот на натпреварувањето ќе биде донесена на следниот состанок, кој е планиран за април во Скопје, кога ќе бидат договорени сите клучни детали и ќе се дефинира конечниот модел на лигата. На состанокот ќе бидат поканети и претставници на клубовите, со цел активно да учествуваат во процесот на донесување одлуки.

Ракометните федерации продолжуваат со интензивната комуникација и соработка со цел спроведување на овој значаен проект за развојот на ракометот во регионот.