Македонската машка ракометна репрезентација со победа ги отвори настапите на „Жолтиот куп“ во Швајцарија, откако вечерва беше подобра од селекцијата на Бахреин со 32-28, во рамки на завршните проверки пред настапот на Европското првенство.

Избраниците на Кире Лазаров дуелот го почнаа претпазливо, со цврсти одбрани и мал број голови во воведните десет минути, кога Македонија имаше минимално водство од 4-2. Како што одминуваше времето, двете екипи го подигнаа ритамот во нападот, а македонската селекција на паузата замина со предност од 15-13.

Во продолжението Бахреин подобро влезе во игра, ги казни неколкуте технички грешки на нашите ракометари и накратко го презеде водството (20-19). Сепак, Македонија брзо се консолидираше, наметна свое темпо и со серија ефективни напади повторно ја презеде контролата, што на крајот резултираше со сигурна победа од 32-28.

Македонските ракометари веќе утре ќе се соочат со Украина, додека последниот натпревар на турнирот е закажан за сабота против домаќинот Швајцарија.