Министерството за надворешни работи на Србија соопшти дека в.д. помошничката-министерка за надворешни работи Наташа Рашевиќ во Белград му ја предала владината согласност за именување на почесниот конзул на Република Северна Македонија во Република Србија, Душан Адамовиќ.

Седиштето на Конзулатот на Република Северна Македонија е во Панчево, со конзуларна јурисдикција која ја опфаќа територијата на административната област Јужен Банат, во која има најголема концентрација на Македонци и луѓе со потекло од Македонија во населението – во Панчево, како и во селата Јабука и Качарево.

На презентацијата на согласноста во Министерството за надворешни работи присуствувале амбасадорот на Република Северна Македонија во Република Србија, Никола Тупанчески и првиот секретар во Амбасадата, Гоце Пејовски.

„Во таа прилика беа потврдени пријателските врски меѓу двете земји и блискоста на двата братски народи, како и очекувањето дека по стапувањето на функцијата почесниот конзул Душан Адамовиќ ќе даде дополнителен поттик за унапредување на билатералните односи меѓу Република Србија и Република Северна Македонија“, пишува во соопштението.