Окружниот суд во Ќустендил го осуди на четири години и шест месеци затвор и парична казна од 50.000 лева (25.000 евра) Дејан Д., кој има и бугарски пасош, за обид на шверц на амфетамин и обид за илегален премин на бугарската граница.

Според БТА, судот во Ќустендил соопштил дека обвинетиот признал вина по трите точки од обвинението – дека се обидел да ја шверцува дрогата вредна околу 27.000 евра, дека поседувал високоризична наркотична супстанца без дозвола и дека се обидел „на диво“ да ја премине границата.

Тој на 7 јули годинава, на излез од Бугарија на граничниот премин „Деве Баир/Ѓуешево” се обидел со неговиот автомобил „Пежо 407″ преку границата да го пренесе амфетаминот, со вкупна тежина од 1.855,78 грама, во две пластични шишиња со етикети на концентрат за автомобилски стакла и зелен чај и дека при царинската контрола го запалил автомобилот и се обидел да побегне во правец на Македонија.

На претходното судско рочиште, одржано на 8 јули, обвинетиот пред Судот изјави дека „не знае што има во шишињата” и дека бил вработен во македонската Царинска управа.