По крвавиот напад што се случи на познатата плажа во Сиднеј, каде татко и син убија 15 и ранија 42 луѓе на јавна прослава на Ханука, се огласи мајката на 24-годишниот терорист.

Верна Акрам за австралиските медиуми рекла дека нејзиниот син ѝ кажал дека со татко му ќе одат на риболов и дека тој никогаш немал оружје.

-Ми се јави и ми рече: „Мамо, пливавме, сега ќе јадеме“ – се присети таа.

Таа го опишала својот син како тивок и ненасилен човек кој избегнувал алкохол, цигари и друштвени собири и кој неодамна ја изгубил работата во градежна компанија. Рекла дека тој „никогаш немал пиштол“ и „не бил некој што би повредил други“.

Семејството Акрам живеело во скромна куќа со три соби во Бонириг, предградие во западен Сиднеј. Соседите ги опишале како мирни луѓе, со малку контакт со заедницата.

„Изгледаа како сосема нормални луѓе. Никогаш не можевме да го замислиме ова“, рекол еден сосед.

Пукањето длабоко ја потресе еврејската заедница во Австралија. Многу израелски и еврејски ресторани останаа затворени, а неколку прослави на Ханука во Сиднеј и Мелбурн беа откажани. Исто така, имаше граѓанска иницијатива за палење свеќи на прозорците во спомен на жртвите во 18:47 часот – точното време кога започна нападот.

Ејал, Израелец кој живее во Сиднеј три години, рече дека нападот му го скршил чувството за безбедност.

„Дојдовме тука за да избегаме од притисокот во Израел. Планиравме да се вратиме на крајот од следната година, но тоа може да се случи порано. Меурот во кој живеевме пукна.“

Австралиската полиција продолжува да ги истражува мотивите на нападот и како двајцата мажи успеале да извршат толку голем напад и покрај претходните предупредувања. Премиерот Албанезе го опиша пукањето како „гнасен чин на терор“ и рече дека властите ќе ги разгледаат постојните протоколи за да идентификуваат и спречат закани за домашната безбедност.

Саџид Акрам, австралиски државјанин роден во Пакистан, пристигна во земјата во 1998 година со студентска виза. Неговиот син е роден во Австралија. Според властите, двајцата напаѓачи биле вооружени со најмалку три долги огнени оружја, а во нивното возило било пронајдено знаме поврзано со Исламска држава (ИСИС). Саџид бил убиен по неколкуминутна размена на оган, додека Навед бил тешко ранет и е во болница во критична состојба.

Масакрот започнал во 18:47 часот за време на прославата на Ханука организирана од движењето Хабад, на која присуствувале стотици членови на заедницата. Камерите за надзор снимиле повеќе од шест минути континуирано пукање. Луѓето бегаа и бараа засолниште, додека жртвите паѓаа, многумина беа погодени додека се обидуваа да ги заштитат своите најблиски.

ФОТО | Вознемирувачки сцени во Сиднеј – се слушаат пукотници, луѓето панично бегаат

Австралиските разузнавачки претставници потврдија дека уште во 2019 година, Австралиската безбедносно-разузнавачка организација (ASIO) отвори истрага против Навед Акрам за врски со ќелија поврзана со ИСИС во Сиднеј. Сепак, премиерот Ентони Албанезе рече дека во тоа време немало докази за непосредна закана. Исламскиот центар Ал-Мурад во Сиднеј, каде што Навид посетувал часови една година, остро го осуди нападот. Неговиот основач, Адам Исмаил, рече дека Навид посетувал часови по Куран и арапски јазик во 2019 година, додавајќи:

„Недвосмислено го осудувам овој чин на насилство и изразувам сочувство до жртвите, нивните семејства и еврејската заедница“.

Меѓу жртвите се неколку истакнати членови на локалните еврејски и израелски заедници. Меѓу 15-те потврдени мртви се рабинот Ели Шлангер, 41, емисар на Хабад кој помогнал во организирањето на настанот; преживеаниот од Холокаустот Алекс Клетман (87), кој беше убиен заштитувајќи ја својата сопруга; Тибор Вајцман, кој, според извештаите, исто така беше застрелан додека ја заштитуваше својата сопруга; Дан Елкајам (27), француско-израелски државјанин кој се преселил во Сиднеј пред една година; рабинот Јакоб Халеви Левитин, исто така од Хабад; Рубен Морисон (62), по потекло од поранешниот Советски Сојуз; Питер Мајгер, пензиониран полицаец од Нов Јужен Велс кој го фотографирал настанот; како и десетгодишната Матилда, чие семејство ја објави нејзината фотографија, но не го откри нејзиното презиме.

Уште 42 лица се повредени, од кои 11 се во сериозна состојба, вклучувајќи двајца полицајци. Болниците низ Сиднеј остануваат во состојба на зголемена готовност.

ФОТО | Вознемирувачки сцени во Сиднеј – се слушаат пукотници, луѓето панично бегаат