Денеска во амфитеатарот на средното медицинско училиште  „Никола Штејн“ во Тетово ќе се одржи третата панел-дискусија во рамки на националната кампања „Магијата е во знаењето“ што ја спроведува Министерството за образование и наука.

Кампањата по повод Светскиот ден на наставниците има цел да ја истакне суштинската улога на наставниците и значењето на нивната професија во општеството.

Панел-дискусијата денеска е на тема „Каква магија се крие зад една петка – минатото и сегашноста во дуел“, со фокус на тоа како се менувало значењето на оценувањето низ генерациите, што значи денес вистински успех и како наставниците го препознаваат трудот и напредокот на учениците во современиот контекст.

На настанот е најавено учество на министерката за образование и наука Весна Јаневска, Милка Тримчевска – директорка на Биро за развој на образованието, Даниела Апостоловска – одделенски наставник и помошник директор во ООУ „Братство – Миѓени“ од Тетово, Сихана Каба Касами – одделенски наставник и директор во тетовското ООУ „Кирил и Методиј“ и Салих Мислими – доктор по општа медицина и професор по стручни предмети во ОСМУ „Никола Штејн” – Тетово.

Настанот ќе може да се следи и во живо на Јутјуб каналот на Министерството за образование и наука на следниот линк.