Американската воена операција против Венецуела, во која загинаа повеќе од 100 војници и цивили, не успеа да ја постигне својата цел да ја понижи Боливарската Република, изјави денес венецуелскиот министер за одбрана Владимир Падрино Лопез на церемонијата на доделување награди на припадници на војската и цивили кои ја бранеа земјата од американската вооружена агресија, пренесува Ројтерс.

„Некои луѓе сакаат да ја понижат Венецуела по воената операција на САД на 3 јануари, но не успеаја да ја постигнат својата цел, бидејќи денес татковината сè уште стои“, рече Лопез..

Тој нагласи дека честа на вооружените сили на Венецуела „останува непоколеблива“ и побара САД да ги ослободат претседателот Николас Мадуро и неговата сопруга Силија Флорес, пренесува Тас.

Лопез изјави дека 47 припадници на венецуелската армија, 32 припадници на кубанската армија и неколку цивили биле убиени во американската агресија, со што вкупниот број на жртви се искачил на над 100. Тој изјави дека, по наредба на вршителот на должноста претседател Делсеа Родригез, е формирана комисија за давање помош на семејствата на загинатите и ранетите.