Македонските Дејвис куп тениски репрезентативци денеска постигнаа победи во мечевите од второто коло на М25 турнирот што се игра во Загреб, Хрватска.

Калин Ивановски со 2:0 во сетови 7:6 (8) и 7:5 за два часа и 13 минути го совлада Павлос Циципас од Грција, братот на Стефанос Циципас, додека Олег Приходко го победи Хлиб Секачов со 6:0, 4:6, 6:4 за два часа и 11 минути.

Ивановски одигра изедначен меч со тенисерот од Грција, пред сè првиот сет кога немаше ниту еден брејк и по 18 поени во 13 гем, нашиот тенисер беше поуспешен со 10:8 и поведе со 1:0 во сетови. Во следниот сет Ивановски го направи единствениот брејк во 11 гем и поведе со 6:5, а потоа сетот го заврши со 7:5.

Приходко на убедлив начин дојде до водство од 1:0 во сетови откако на ривалот не му дозволи ниту еден гем (6:0), но во вториот сет испушти предност од брејк и водство од 2:1, за противникот да направи два брејка прво за 3:3, а потоа и за 6:4 во гемови и да изедначи на 1:1 во сетови. Во решавачкиот сет Приходко направи брејк и поведе со 4:3 што се покажа како решавачко.

Во текот на денот македонските тенисери ќе настапат и во конкуренција на двојки Калин Ивановски со Амар Хусеиновиќ, додека Приходко ќе игра заедно со Андреј Чепелев.