Иран предупреди дека е „неприфатливо и опасно“ бродови да поминуваат низ Ормускиот Теснец без негова дозвола
Иран вчера ги предупреди сопствениците на бродови дека секоја нова маршрута низ Ормускиот Теснец без координација со Техеран е „неприфатлива и опасна“ и се закани со мерки против пловила што не ги почитуваат условите, објави „ЦНБЦ“.
Препорачано
Острата порака ја нагласува решеноста на Техеран да ја задржи контролата врз Ормускиот Теснец и да се спротивстави на транзити што ја заобиколуваат неговата дозвола.
Воедно, сè уште има неизвесност за бродските компании што пловат низ теснецот, и покрај договорот меѓу САД и Иран од минатата недела за повторно отворање на овој стратешки важен морски премин.
Поморските сили на Иранската Исламска револуционерна гарда (ИРГЦ) соопштија дека само бродските рути назначени од Иран се дозволени за пловидба и дека координацијата со иранските сили е задолжителна.
„Пловидбата надвор од овие рути е крајно опасна и забранета, и ги предупредуваме сите пловила строго да избегнуваат какво било движење надвор од одредените коридори“, соопшти морнарицата на ИРГЦ.
Предупредувањето доаѓа по предлог на една клучна поморска информативна група која во саботата предложила алтернативни бродски коридори, повикувајќи ги сопствениците на бродови да го користат јужниот правец низ теснецот со вклучени транспондери.
„Јужната транзитна маршрута, долж територијалните води на Оман, е потврдена како чиста од мини и е препорачана“, се наведува во известувањето.
Податоците за сообраќајот укажуваат на привремено закрепнување. Бројот на транзити се зголемил на 93 минатиот викенд, според податоците на компанијата „Маринтрафик“ за следење на бродови, но сè уште е далеку под нивоата од пред војната, кога низ теснецот минувале повеќе од 100 бродови дневно.
„Операторите сè уште се движат претпазливо, наместо да се вратат на целосно нормални шеми на сообраќај“, соопшти компанијата.
Аналитичарите предупредуваат дека каква било форма на иранска контрола може да има долгорочни последици врз протокот на нафта низ теснецот, бидејќи сообраќајот можеби нема целосно да се врати на предвоените нивоа доколку Техеран задржи стратешка контрола врз морскиот премин.
