САД издадоа 60-дневно изземање од санкциите за Иран, со кое се дозволува продажба и испорака на иранска нафта до 21 август, додека Техеран го демантира тврдењето на американскиот потпретседател Џеј Ди Венс дека ќе дозволи враќање на нуклеарните инспектори, објави „Би-би-си“.

По преговорите во Швајцарија, Венс изјави дека разговорите со Меѓународната агенција за атомска енергија (МААЕ) би можеле да почнат „уште денеска“.

Но, иранското Министерство за надворешни работи за државните медиуми соопшти дека Техеран не презел „никакви нови обврски“ во врска со нуклеарните инспекции.

Ова се случи откако САД привремено ги укинаа санкциите, овозможувајќи му на Иран првпат по неколку децении да продава нафта во американски долари.

Во заедничка изјава објавена во понеделникот, посредниците Катар и Пакистан соопштија дека, по првата рунда разговори во швајцарското одморалиште Биргеншток, САД и Иран се согласиле на „патоказ за постигнување конечен договор во рок од 60 дена“.

Венс ги опиша разговорите како основа што поставила „многу добра подлога“.

Американскиот потпретседател рече дека тимовите разговарале за повторното отворање на Ормускиот Теснец и за „деескалација во рамки на регионалниот прекин на огнот“.

Американски сенатор: Ако договорот пропадне, Трамп ќе го преземе Ормускиот Теснец и ќе наплаќа

Изземање од санкциите

САД издадоа 60-дневно изземање од санкциите, со кое се дозволува производство, продажба и испорака на иранска сурова нафта и петрохемиски производи до 21 август. Со оваа мерка се отвора можност иранската нафта директно да се увезува во САД, а се овозможуваат и банкарски трансакции, осигурување и транспорт, без досегашните сложени посреднички мрежи што Техеран ги користеше за извоз на нафта.

Изземањето од санкциите ги урива централните столбови на долгогодишното ембарго на Вашингтон, кое историски ја задушуваше иранската економија.

Американскиот министер за финансии Скот Бесент изјави дека, за возврат, Иран се обврзал да го задржи отворен Ормускиот Теснец и да дозволи враќање на инспекторите на МААЕ.

Потпретседателот Џеј Ди Венс рече дека разговорите со нуклеарните инспектори би можеле да почнат веднаш, но Техеран го демантираше тоа. Портпаролот на иранското МНР, Есмаил Багаи, изјави дека Иран не презел нови обврски и дека секоја соработка ќе се одвива според постојните процедури.

Во меѓувреме, по разговорите во Швајцарија, треба да се формираат работни групи за нуклеарните прашања, санкциите и реконструкцијата.

Посредниците Катар и Пакистан соопштија дека е воспоставена комуникациска линија за безбеден премин низ Ормускиот Теснец, како и механизам за деескалација поврзан со Либан.

Повеќето Американци сакаат да заврши војната со Иран, но малкумина веруваат дека САД извлекле добар договор