Американската скијачка Линдзи Вон изјави дека претрпела сериозна повреда на коленото, но се надева дека ќе се натпреварува на Зимските олимписки игри во Италија (6 – 22 февруари 2026 година).

41-годишната скијачка беше префрлена со хеликоптер во болница во Швајцарија во петокот откако падна на последната трка од Светскиот куп пред Игрите.

Поранешната олимписка шампионка изјави дека нејзиното колено е стабилно и не е отечено, и се надева дека ќе се натпреварува на спустот во Кортина.

– Ова очигледно не е она на што се надевав. Работев многу напорно за да стигнам до Игрите. Знам какви ми беа шансите и знам дека сега не ми се исти, но шансата е тука. Додека има шанса, ќе се обидам – рече Вон.

Евентуален медал во Кортина би го срушил рекордот што го постави во 2018 година кога стана најстарата жена што се искачи на подиумот во таа дисциплина на Зимските олимписки игри.