Професорот на Универзитетот во Лиеж, Лиридон Лика, оценил дека по прогласувањето на независноста меѓународниот фактор помогнал Косово да биде признаено од повеќе земји, но дека по четири години има стагнација во тој процес, пренесува Коха. Лика истакна дека косовските институции требало да направат повеќе во оваа насока, но дека не биле многу проактивни.

„Во годините по независноста имаше поактивна политика на Западот и повеќето сојузници не признаа, освен пет земји од ЕУ. Голем дел од земјите што не признаа тоа го направија поради поддршката на САД и другите земји. Имаа попроактивна политика во првите години, но по овој период и нашите институции мораа да бидат многу поактивни, да лобираат повеќе. Можеа да направат повеќе, да бидат поприсутни на меѓународната сцена, да ја ангажираат албанската дијаспора, која може да лобира“, рече тој.

Лика рече дека Косово можело да го искористи мислењето на Меѓународниот суд на правдата за прогласувањето независност, според кое декларацијата не претставува кршење на меѓународното право. За ставот на Европската унија кон Косово, Лика рече дека ЕУ веќе две децении ги повторува истите декларации за членство.

„Поминаа 20 години откако ЕУ ги повтори речиси истите политички изјави дека Косово ќе ѝ се придружи, дека има јасна перспектива за членство, но нема конкретна политичка волја за брзо проширување кон Западен Балкан“, заклучи тој.