Лидерот на белоруската опозиција во егзил, Светлана Тихановска, ја повика Канада дополнително да ги санкционира функционерите кои водат „про-Кремљ“ политика во нејзината земја, чиј опстанок, како што вели таа, е загрозен.

„Ќе побарам од Канада да го заостри својот тон и да преземе чекори за поддршка на нашата независност“, им рече таа на новинарите еден ден пред средбата со канадскиот премиер Џастин Трудо.

Тихановска предупреди на „правен вакуум“ што овозможува да се заобиколат канадските санкции наметнати на повеќе од 60 функционери на режимот на Александар Лукашенко.

Лидерката на опозицијата рече дека е загрижена дека Русија би можела да ја „исцица Белорусија“, неколку дена по состанокот со министерот за надворешни работи на Европската унија во Брисел.

„Денес, самото постоење на Белорусија е загрозено“, предупреди таа. „Би сакала да побарам од Канада во иднина да се усогласи со ЕУ, Соединетите Американски Држави и Велика Британија и да излезе со заедничка стратегија кон Белорусија“.

По повод нејзината прва посета на канадската престолнина Отава, лидерката на опозицијата планира да побара поголема помош за белоруското граѓанско општество, особено за независните новинари, но и за политичките затвореници и нивните семејства, изјави таа за новинарите.