Екипата на Лос Анџелес Клиперс во НБА дербито беше подобра од градскиот ривал Лос Анџелес Лејкерс со конечен резултат 111:106. Клиперси успеаја да направат комплетен пресврт во текот на второто полувреме, откако првото го добија Лејкерси со 63:51.

Најефикасен во победничките редови беше Кавај Ленард со реализирани 35 поени, запиша уште 12 скокови и пет асистенции. А на спротивната страна во дресот на „езерџиите“ се истакнаа Кајл Кузма со 25 и Ентони Дејвис со 24 поени.

Во останатите две средби, Денвер загуби дома од Њу Орлеанс Пеликанс (100:112), а Голден Стејт Вориорс со 116:104 славеше над Хјустон Рокетс.

Гостите од Луизијана беа предводени од Брендон Инграм со 31 поен и седум скокови, а за Нагетси доминираше српскиот центар Никола Јокиќ кој забележа „дабл-дабл“ учинок (23 поени, 10 скокови, четири асистенции).

И покрај поразот ЛА Лејкерс останува првопласиран на Западот со учинок од 24 победи и седум порази, додека во Источната конференција води составот на Милвоки Бакс (27-5).