Правниот сектор на Лекарската комора на Македонија вчера од официјалниот мејл испратил препорака до матичните лекари да го препишуваат лекот „ивермектин“ со текст кој е идентичен со оној од сајтот Емитер, чијшто автор е Марјан Божиновски, доктор на технички науки.

Меѓутоа, препораката, наместо од Божиновски, е потпишана од „стручниот колегиум на ЈЗУ Универзитетска клиника за пулмологија и алергологија и ковид-19 центрите на интернистичкиот блок”.

„Каква срамота е ова. Ова е голем скандал и за ова треба некој да одговара. Текстот е плагијат, автор на оригиналниот текст е Марјан Божиновски кој нема никаква врска со наведениот колегиум и истиот е објавен во списанието Емитер во август годинава”, напиша матичниот лекар Ненад Лазаров на својот Фејсбук профил.

Прашавме во Лекарската комора за што станува збор, дали им е хакиран мејлот, но одговор не добивме.

– Мене воопшто не ми е важно тоа. Најважно ми е што побрзо лекарите да го препишуваат лекот и да се спасуваат луѓе, ни изјави Божиновски.

Божиновски докторирал во 2004 година во Данска во рамките на Институтот за електронски системи. Универзитетот на кој докторирал, според Шангајската листа, е на второ место во Европа, а на 14 место во светот во областа на електрично и електронско инженерство.

Матичните лекари добија насоки, рецепти за „ивермектин“ може да се издаваат