Легендарниот тренер Светислав Пешиќ кој го предводи Баерн Минхен, каде што настапува македонскиот кошаркар Ненад Димитријевиќ, во интервју за германскиот весник „Die Zeit“ откри дека крајот на неговата тренерска кариера е сѐ поблиску.

Пешиќ сезонава пристигна во Баерн и успеа да ги разбуди „баварците“, враќајќи им ја конкурентноста по серијата лоши резултати.

Трофејниот стратег, кој во својата кариера има освоено речиси сѐ што може да се освои, истакна дека во последно време конечно спие мирно, нешто што, како што вели, не било случај во најголемиот дел од неговата кариера.

„Всушност, не сакав да работам до крајот на сезоната. Сакав да имам повеќе време за семејството, особено за мојата сопруга Вера. Потоа ми се јави Херберт Хајнер, претседателот на Баерн. Клубот штотуку се раздели со Гордон Херберт по осум последователни порази во Евролига. Ме праша дали можам да го преземам тимот до крајот на сезоната. Му реков дека најпрво сакам да разговарам со сопругата. Вера ја сака кошарката, дури и самата играше. Ми рече: „Ако те повика претседателот, не можеш да кажеш ‘не’.“ Не би прифатил ниту еден друг клуб, но со Баерн Минхен се идентификувам сто отсто. Тоа е мој клуб, клуб на моето срце“, изјави Пешиќ.

Искусниот стратег најави дека по крајот на сезоната ќе стави точка на тренерската кариера.

„Секогаш ќе бидам дел од кошарката, ќе одржувам предавања и слично. Но, во оваа фаза од животот повеќе не можам да бидам главен тренер. Знам дека луѓето нема да ми веруваат кога ќе кажам дека се повлекувам, но по оваа сезона навистина е доста. Имам прекрасен дом во Барселона, каде што живее дел од моето семејство. Сакам да поминувам повеќе време и во мојот роден Пирот. Сакам да го доживеам животот од поинаква перспектива“, порача Пешиќ.