Лајчак: Средбата Вучиќ Курти беше тешка, не е постигнат значаен напредок
Специјалниот претставник на ЕУ за Дијалогот меѓу Белград и Приштина, Мирослав Лајчак, по денешната рунда преговори меѓу српскиот претседател и косовскиот премиер изрази разочараност, јави дописничката на МИА од Брисел.
-Средбата беше тешка и покажа многу различни пристапи на двете страни кон нормализацијата на односите меѓу Косово и Србија. Како последица на ова постигнавме многу малку напредок денес, изјави Лајчак.
Тој потврди дека се разговарале за повеќе предлози, но дека за сега единствен заклучок е дека преговорите ќе продолжат.
-Страните се согласија дека нивните главни преговарачи ќе одржуваат средби секој месец, со олеснување на Европската Унија, за справување со тековните прашања и подготовка на следните средби на високо нови кога тоа ќе биде потребно.
Ова е втора рунда преговори откако Албин Курти стана премиер на Косово.
Следната лидерска средба меѓу српскиот претседател и косовскиот премиер ќе се одржи во септември.
-За нас, за ЕУ, важно е да истакнеме дека европската иднина на Србија и Косово зависи од нормализацијата на нивните односи. Затоа очекуваме двете страни да соработуваат за надминување на наследството од минатото и да ги решат крупните прашања кои постојат меѓу нив, изјави Лајчак