Претставникот на Европската Унија за дијалог меѓу Косово и Србија Мирослав Лајчак (кој е во заминување) изјави дека е горд на соработката на ЕУ со САД во текот на неговиот мандат. Минатата вечер на социјалната мрежа „Икс“ тој пишуваше за состанокот на заменик помошникот американски државен секретар за Западен Балкан Александар Касаноф и помошникот државен секретар Џејмс О` Брајан.

Мојата прва мисија во 2025 ме однесе во САД. Во Вашингтон имав опсежна дискусија за Западен Балкан со Касаноф. Горд сум на одличната соработка меѓу ЕУ и САД во текот на мојот мандат, напиша Лајчак.

Мандатот на Лајчак истекува на крајот на јануари, додека ЕУ потврди дека во тек е процес на избор на негов наследник.

Во петокот на 3 јануари истече рокот за поднесување кандидатури, а високата претставничка за надворешна политика и безбедност Каја Калас ќе избере кого ќе го именува за специјален претставник на ЕУ за дијалог. Меѓу имињата кои најмногу се споменуваат се поранешниот министер на Финска Пеко Хависто и дипломатот од Данска Петер Соренсен.