По повод Денот на нулта дискриминација, Комисијата за заштита и спречување на дискриминација (КСЗД) потсетува дека секој има право на живот со достоинство, еднаквост и целосна заштита на човековите права, а притоа посочува дека годинава фокусот е на континуираната дискриминација со која се соочуваат луѓето што живеат и се изложени на ризик од ХИВ.

„Таквата дискриминација директно го ограничува пристапот до здравствени услуги, доведува до повреда на основните права и го попречува глобалниот напредок кон искоренување на СИДА-та до 2030 година. Централната порака на овогодинешното одбележување е јасна – луѓето мора да бидат ставени на прво место“, соопштува КСЗД.

Во Македонија, велат од Антидискриминаторска комисија, стигмата кон луѓето што живеат со ХИВ и понатаму е присутна, особено во здравствениот сектор.

Една третина од луѓето со ХИВ не ни знаат дека го имаат вирусот – државата мора да инвестира во тестирања и рана дијагностика

„Според податоците за 2025 година, 90% од пријавените случаи на дискриминација врз лица што живеат со ХИВ се евидентирани токму во здравството. Овој податок укажува дека недоволното познавање на начинот на пренос на ХИВ и стравот заснован на предрасуди, резултираат со здравствени нееднаквости и прекршување на човековите права“, нагласува КСЗД.

Според Комисијата, доказите се недвосмислени – податоци собрани од повеќе од 30.000 луѓе што живеат со ХИВ во 25 земји покажуваат дека стигмата и дискриминацијата остануваат сериозни и широко распространети бариери за пристап до здравствена заштита, достоинствен третман и ефективна заштита на човековите права.

ИЈЗ: Регистрирани 38 лица со ХИВ/СИДА во Македонија годинава

„Наместо поддршка и солидарност, многу лица сè уште се соочуваат со предрасуди, одбивање и нееднаков третман“, децидни се од КСЗД.

Како што посочуваат, образованието претставува клучна алка во сузбивањето на стереотипите и предрасудите што генерираат дискриминација кон ранливите категории, особено кон девојките и жените, лицата со попреченост, ЛГБТИ лицата и Ромите.

„Оттука, законската рамка во областа на образованието мора експлицитно да ги препознае овие категории и да обезбеди правна основа за системски програми насочени кон елиминирање на родовите стереотипи, стигмата поврзана со сексуалната ориентација и здравствената состојба, како и предрасудите врз основа на етничка припадност. ЛГБТИ децата често се изложени на врсничко насилство (булинг), додека девојчињата се соочуваат со зголемен ризик од родово базирано насилство и сексуално вознемирување. Загрижувачки е фактот што значителен процент од ЛГБТИ младите изјавуваат дека размислувале за самоубиство“, соопштуваат од КСЗД.

Ова, дополнуваат од таму, е јасен показател дека образовните политики мора да бидат насочени кон создавање безбедна и инклузивна средина во која ниту едно дете нема да се чувствува отфрлено или небезбедно.