Косовската трговска компанија „Вива Фреш Стор“ постигнала договор за купување на македонскиот ланец маркети „Тинекс“, во сопственост на семејството Тодоровиќ, објави порталот „Шќип медија“.

Во извештајот се вели дека вредноста на зделката е околу 90 милиони евра. Македонската компанија, според информациите на нејзината веб-страница, во моментов работи со вкупно 44 маркети ширум државата. Според „Шќип медија“, се очекува продажбата на „Тинекс“ да се официјализира во следните денови.

[Обновено] Порталот подоцна објави дека информацијата, која ја добил од извори во „Тинекс“, не била точна и била демантирана од локалниот менаџмент на „Вива фреш“ во Македонија.

„Шќип медија“: „Вива фреш“ сепак не го купува „Тинекс“

„Вива Фреш Стор“ е водечки ланец на маркети во Косово. Има 64 објекти во 21 град во земјата и работи со повеќе од 60.000 различни производи. Според податоците од Косово, „Вива фреш стор“ има над 3.000 вработени и генерира годишни приходи од над 200 милиони долари. Во август 2019 година, „Вива фреш“ ја почна својата експанзија во Македонија со отворање на маркет во Скопје, а купи и локална фабрика за месо, од каде ги снабдува со свежо месо сите 64 свои маркети во Косово.

Косовската групација лани го купи штипскиот ланец супермаркети „Кит Го“.