Екипата на Феникс 2010 го претрпе првиот пораз на домашен терен, откако загуби од Еуро Никел 2005 во Скопје (83:78) во Првата македонска кошаркарска лига.

Искусниот Дарко Соколов ја погоди клучната тројка во последната минута од мечот и кавадарчани стигнаа до „брејк“ за важна победа по паузата во шампионатот.

Денешниот дуел беше трет за Еуро Никел 2005 во СРЦ „Кале“ од почетокот на оваа сезона, а стигнаа само до првата победа, откако претходно загубија од Чаир 2030 и од ТФТ.

На овој натпревар, до израз дојде искуството на гостинските играчи кои во текот на мечот водеа и со 17 поени разлика (65:48). Но, и тука не беше скршен отпорот на Феникс 2010. На 50 секунди пред крајот, домашниот тим дојде до израмнување (76:76), подоцна и (78:78), но тука домаќинот како да застана одново.

Соколов со исклучително важна тројка го однесе Еуро Никел на (81:78), Бакингем во следниот напад не успеа да врати, а конечниот резултат го постави Планиниќ од линијата за слободни фрлања.

Младеновиќ постигна 27 поени во победничките редови, а на спротивната страна Трајковски реализираше 24 коша. По шест одиграни кола двете екипи сега се израмнети со биланс од четири победи и два порази.