На шест дена пред стартот на Европското првенство, ракометната репрезентација на Црна Гора се соочува со големи проблеми поради коронавирусот. На задолжителното ПЦР тестирање кое беше направено утринава, позитивни на ковид-19 се шест ракометари и двајца членови на стручниот штаб.

„Последното задолжително тестирање пред заминувањето во Дебрецин кое е планирано за вторник, ракометарите ќе го направат во понеделник по што ќе се знае и конечниот список на патници. Само играчите и членовите на делегацијата кои ќе бидат негативни ќе патуваат за Дебрецин, каде ќе ги играат натпреварите со Данска, Македонија и со Словенија“, соопшти Ракометната федерација на Црна Гора.

Македонија е вториот противник на Црногорците и натпреварот ќе се игра на 15 јануари, додека во првото коло тие ќе се сретнат со селекцијата на Данска.