По спроведени 262 вонредни инспекциски контроли на безбедноста на детските новогодишни пакетчиња, Агенцијата за храна и ветеринарство (АХВ) утврдила само минимални недоследности, без изрекување парични казни и без повлекување небезбедна храна од промет.

Контролите биле извршени во магацини за пакување, маркети и продавници кои вршат промет со новогодишни пакетчиња.

Како што соопштува АХВ, инспекциските служби издале четири решенија за повлекување на пакетчиња од промет поради несовпаѓање на роковите на збирната декларација со роковите на поединечните производи и поради некомплетни декларации. На двајца оператори со храна им се издадени решенија со наредба за дополнително означување, односно ставање збирни декларации на пакетчињата.

Во споредба со минатата година, кога биле утврдени сериозни неправилности како пакетчиња без декларации, со истечен рок на употреба, краток рок на трајност и производи со променети органолептички својства, годинава кај операторите се констатирани само минимални недоследности.

Од АХВ информираат дека и во наредниот период, особено пред и по новогодишните празници, ќе продолжат со засилени контроли за следење на безбедноста на оваа категорија производи.