Општина Битола во 2026 и 2027 ќе даде 355.000 евра од парите доделени од унгарскиот кредит од Владата за да изгради терариум наменет за змии и други влечуги, како и за живеалиште за копитари во Зоолошката градина во градот, јавува „СДК.мк“.

Во измените и дополнувањата на Програмата за развојни планови што ги донесе општинскиот Совет, за 2026 и 2027 година предвидено е за терариум да се дадат вкупно 169.000 евра, а за живеалиштето за копитари 185.000 евра. Само годинава, изградбата на овие објекти ќе чини над 205.000 евра.

За парите што ќе се потрошат бурно се дискутираше и на седницата на Советот минатата недела. Советничката на СДСМ Софија Ристевска-Петрушева рече дека во услови кога луѓе се трујат во најголемиот електроенергетски гигант во змејава, РЕК „Битола“, улиците се со дупки, а депонии има наоколу, Општина Битола троши огромни пари за терариуми и копитари.

„Ова ми лици на анегдотата со Марија Антоанета, француската кралица која живеела во дворец во Париз. Кога ѝ кажале дека луѓето немаат леб, таа одговорила ‘нека јадат колачиња’. Се прашувам кој ќе има профит од овие живеалишта за копитари и змии? И ако имате можност да ја подобрите (Зоолошката градина, н.з.) зошто не набавивте слон или жирафа“, рече Ристевска-Петрушева.

Зоолошката градина во Битола постои 76 години и во изминатиот период честопати имаше најави дека постои опасност од затворање поради условите за престој на животните. Нема доволно кадар и дури сега се најавени 12 вработувања. Коњановски најави дека денеска се очекува да пристигнат и нови жители – мајмуни патас, лемури и коати од Зоолошката градина во Скопје, а до мај како подарок од Зоолошката градина во Белград и бизон, антилопи, коати, свет ибис и сервал.