Конференциска лига: Силекс ремизираше, Струга избегна пораз во Летонија
Силекс и Струга Трим Лум денеска ги одиграа првите натпревари од 1. квалификациско коло во новоформираната УЕФА Конференциска лига, и двете наши екипи одиграа нерешено.
На ФФМ Тренинг центарот во Скопје Силекс ремизираше со молдавскиот клуб Петрокуб со резултат 1:1 (1:1).
Кратовци уште во петтата минута поведоа со голот на Додевски после асистенцијата на Рајков. Гостите успеаја да израмнат непосредно пред паузата (45+4`) со погодокот на Платика.
Стружани во своето европско деби извлече добар резултат во Летонија играјќи нерешено 1:1 со Лиепаја.
Домаќините со голот на Бразилецот Додо дојдоа во позитива во 31 минута, а играчите на тренерот Захариевски во финишот избегнаа поразот (90+3`) благодарение на голот на Исени.
Реванш дуелот помеѓу Струга Трим Лум и Лиепаја ќе се игра во Скопје од 17.00 часот на 15 јули, а истиот ден од 19.00 часот Силекс гостува во Молдавија.